السلام عليكم ورحمة الله وبركاته
كل سنة وحضراتكم طيبين وبالف خير
من فترة كده قرأت حاجة على الفيس ولفتت انتباهي
فيه بنوتة كتبت رسالة للجميع
بتقول بمناسبة حلول رمضان الكريم انا بعتذرللجميع
على أي كلمة وعلى أي نظرة وعلى أي سوء ظن مني
وعلى أي سوء تفاهم او خصام او خلاف او ظلم من طرفي
واتمنى من الجميع يسامحوني على كل حاجة صدرت مني
الكلام ده جميل وفكرة جميلة ولفتة اجمل واجمل
انا عن نفسي مش معترضة وبحييها على مبادرتها
بس في نفس الوقت شايفة ان الاعتذار عن الخطأ
او عن سوء الظن او الظلم او اي حاجة سلبية صدرت مننا
المفروض الاعتذار ده يكون في كل الاوقات وكل الفترات
مش في رمضان بس
لان الشهور كلها والايام كلها هي بتاعت ربنا
والكل لازم يصفي قلبه على طول ومعظم الوقت
مش استنى فترة معينة او شهر معين
عشان اعتذر وابتدي صفحة جديدة مع الناس
وكمان في حاجة غريبة بتحصل
فيه البعض مش بيصلّوا غير في شهر رمضان
وكأن رمضان بس هو الي مفروضة فيه الصلاة
وباقي الاشهر مش مهم
وفيه كمان الي بيقول لا انا مش هكذب عيب احنا في رمضان
انا مش هعمل معاصي حرام احنا في رمضان
انا مش هسرق حرام احنا في رمضان
انا مش هتكلم في سيرة الناس حرام احنا في رمضان
وامثلة كثيرة اوي اوي
طيب لو مشينا على نهج الكلام ده
يبقى الكذب والمعاصي والسرقة والنميمة والغيبة
مباحة وتجوز طووول السنة وحلال الا في رمضان !!!
ايه رأيكم في التفكير ده ؟
الخميس نوفمبر 05, 2020 10:18 am من طرف SALM-SLIM
